Home » Publicazions » Cunvigne “Lusignis di Lûs, ritais di Scûr”

Cunvigne “Lusignis di Lûs, ritais di Scûr”

Anade di publicazion:2011

Dipartiment: ,

Convegno Lusignis di lus La lungje fadie di cetancj ricercjadôrs, che a àn visitât informadôrs in tancj paîs dal Friûl, e à permetût la stampe di une vore di volums relatîfs a mîts, flabis e liendis di gjenerazions dai timps passâts, tramandâts da lis nonis aes gnecis. Si concedìn l’ûs dal feminin par vie che lis feminis, come che a àn savût conservâ tal lôr sen lis creaturis, cussì a àn tignût in vite, tes lôr comunitâts, contis di crodincis e tradizions.

O varìn par simpri, cumò che a stan par distudâsi, lis storiis di orcui, di aganis, di fogoladis, di spirts, di striis, di muarts che a tornin e vie indenant. Un tesaur che o lassìn a chei che a vignaran dopo.

No savevin, però, ce significât che a vevin chestis figuris che a vivevin tra la realtât e la irealtât. Nus coventavin interpretazions profondis par capî cemût che a viodevin il mont i nestris antenâts, ce spiegazions che a podevin dâ a ce che al capitave tes lôr zornadis, tes lôr stagjons, te lôr vite, a la realtât che e restave dispès misteriose e conturbant. Dispès a pensavin cu la lôr imagjinazion, te suaze de lôr esperience, che a fossin des fuarcis, podês e savês che bisugnave cognossi par imparâ a vivi miôr che si podeve, dominant, dislontanant o confrontantsi in cualchi maniere cul “salvadi” dispès oribil e spaventevul, cirint di conservâ e di meti in sigurece fameis, cjasis, cjamps e racueltis.

Par cjatâ une spiegazion ai mûts di pensâ e di compuartâsi dal om in face ai events che no si puedin spiegâ e a fats incomprensibii, l’Istitût “A. Tellini”, dopo vê publicât i volums sui mîts dal Friûl, al à inmaneât la cunvigne “Lusignis di lûs, Ritais di scûr
(figuris mitichis malefichis e benefichis dal imagjinari furlan).

La cunvigne no à tamesât ducj i cantins, ma jentrant dentri dal “crepuscul” (tra la lûs e il scûr) ciertis spiegazions a son vignudis fûr midiant des relazions tignudis dai
studiôs che o vin scoltât a Colorêt di Montalban tal Març passât: Roberta Astori, Gianpaolo Gri, Stefano Morandini e Domenico Zannier.

Par fâ in mût che tante int e vegni a cognossi la nestre storie (ancje la mitologjie e je miscliçade te storie) e de nestre culture, l’Istitût “A. Tellini” al à pensât ben di publicâ
i ats de Cunvigne.

Par vie che la incressite de cognossince e ven ancje midiant dal paragon cun altris identitâts a traviers i mieçs di comunicazion dai nestris dîs, l’Istitût “A. Tellini” al à
organizât il Festival bienâl internazionâl cui curtmetraçs “D’incjant l’incjant”, cul fin di scuvierzi ducj i struments espressîfs che ancje altris regjons talianis e altris nazions a àn par ricercjâ e indagâ suntun mont che nô o considerìn inmagât.

Prefazion di Guido Sut