Home » Publicazions » Discolçs des rois a la Tor

Discolçs des rois a la Tor

Anade di publicazion:2011

Dipartiment:

Discolçs des rois a la TorAUTÔR: Gianluca Comar

I nons dai puescj di Tapoian

Tapoian: paisut, vile, su la rive drete de Tor, che e sbrisse, come un grant madrac intal vert de Basse furlane par, dopo, imbraçâ insiemit cul Lusinç la marine di Grau.
Robe di pôc, se anìn a cjalâ numars di cjasis e di int; siore di medole, si va a capî ducj chei che lì a àn metût, e a metin, adun la sô vite. Une strade a fier di cjaval, che e sint su la sô cope lis cjasis, che e zire ator dal paîs, cjapant drenti il cûr; e dopo borcs, che si slungjin chel tant bande dal flum, scuasi cun pôre o rispiet pes aghis, che a son vite, ma pinsîr cuant che si sglonfin e a sburtin cu lis montanis bande il mâr. Epûr, la grant part dai borcs a son bande di là, biel lant a Romans, par vite antighe, che su chê altre rive e imbocje la vie dal borc di Racojan.
Une vore di cjasis te vile e pai borcs, a son cressudis spale a spale, une volte par difindisi (a soreli a mont al jere il cunfin cun Vignesie; di bande di chel jevât, a vignivin simpri in ca gnûfs popui), ma ancje par sparagn, di spese, e di tant lavôr a cjapâ sù claps, glerie e savalon de Tor, o spindi e partâ piere di Migjee, cjote intes gjavis e là dai pichepiere.

Al è sigûr che la int e sedi lade fin te “gjave” di Aquilee romane, par partâ in cà pieris: une e je fûr in biele mostre su la façade di une cjase, par vie che e veve une scrite, e chê no si tapone se daûr e je o culture o maravee. Planc a planc, la int si è fermade, dulà che il pericul al jere di mancul e il vantaç di plui. Dispès, vantaçs e pericui a jerin simpri pi in sù, e cussì, par metiju a pari, a son vignûts rapârs e fuessis par parâsi de aghe; murais, durions, cjasifuartis, curtinis par parâsi de int.

Dut chest buligâ di vite al salte fûr in chest lavôr di toponomastiche, di Zuanluche Comar, che, pe storie, al è come il sanc pal nestri cuarp.

[…]

(prefazion di Ferruccio Tassin)