Home » Publicazions » Il sium, il viaç, la bataie

Il sium, il viaç, la bataie

Anade di publicazion:2005

Dipartiment: ,

Il sium, il viaç la bataie / Il miluç de magne

AUTORE: Alessandro Carrozzo

Presentazion

Il tiermin “culture”, stant ae acezion invalse inte sience antropologjiche, al cjape drenti ducj i prodots materiâi di une comunitât.

Se il tiermin al è universâl, al vâl ancje pal Friûl, tiere privilegjade, no dome par jessi un compendi dal univiers (come che al marcave Ipolit Nievo), considerant la varietât gjeomorfologjiche dal so teritori, ma soredut par jessi metût inta chê crosere di popui e di vicendis storichis che lu àn intimementri segnât.
Cumò, il lunc periodi che al va de comparse dai procès di ominizazion fin al dì di vuê e che – cun estreme semplificazion – si po dividi in ete de piere, ete dai metai e ete de sience, al è cuintrimarcât di doi stadis evolutîfs, in relazion aes funzions cognitivis:

  • arcaic o paleo – logjic, caraterizât dal pinsîr imagjinatîf – simbolic;
  • resint o neo – logjic, caraterizât dal pinsîr analitic – leterâl.

Fate cheste jentrade di fonde, i materiâi che a costituissin i Mîts, Flabis e Liendis dal Friûl storic, a partegnin al stadi arcaic de evoluzion biologjiche – culturâl. Tâl stadi dal pinsîr, come che si à viodût, al è imperniât su la polaritât imagjinative – simboliche, fase aurorâl de cussience umane e si espliche cun sicurece a traviers il metodi analogjic, il metodi contagjôs, il metodi integratîf e il metodi opositîf.

Ogni metodi, po, tal so interni si diviersifiche inte funzion cognitive e in chê magjiche-operative.
Al va tignût cont, par altri, che in chel contest di pinsîr il predicjât – drenti de proposizion – nol davuelç la sô funzion “servîl” di esplicitazion “interiôr” dal sogjet, ma dome i va daprûf: nol po fâ in maniere diferente, par cuestions struturâls, par cause dal globalisim dal predicjât, ma ancje dal sogjet, scomençant a produsi il principi di contradizion, element che al marche il stadi arcaic de evoluzion.
Il principi di contradizion al è ae gjenesi dal sub – principi di ecuivalence e dal sub – principi di simbul, ven a stâi di “sostitût”.
A chest pont a van fatis un pocjis di precisazions:

  • Mîts: a rivuardin visions totalizantis dal mont, de divinitât, dal jessi, de vite e de muart, dal ben e dal mâl. E je la ricercje dal parcè des cjossis.
  • Flabis: si riferissin a archetips, ven a stâi a modei che si ripetin in continuazion, di fenomins esistenziâi (puaretât, ricjece, onestât, falsitât, gjenerositât, malatie, furbizie, inamorament, amôr, fuarcis de nature e v. i. ).
  • Lis Faulis no son nuie altri che Flabis, ma fatis rindi a traviers il simbolisim des bestiis, soredut par intindiment didatic.
  • Liendis: a contemplin lis vicendis di vite di un eroi, ven a stâi di un personaç significatîf, tant tal ben che tal mâl (a son ancje erois in negatîf) a significâ senaris bogns di caraterizâ timps storics, coletîfs o privâts.

Po ben, lis informazions che a son intai Mîts,Flabis e Liendis, che a utilizin il pinsîr imagjinatîf – simbolic, a van decodificadis, tant a dî tradusudis a secont dai stîi dal dì di vuê, propi dal pinsîr analitic – leterâl.
Chest ultin al è un insiemit che si articule intai successîfs sot insiemis:

  • discriminazion
  • selezion mirade
  • astrazion
  • sintesi (relazions).

Par tant, in sede di gjestion de proposizio, pes cundizions strutûrals di “analiticisim” des funzions mentâls, il predicjât al davuelç la sô legjitime funzion di clarificazion dal sogjet, no lant cuintri dal sogjet: di dut chest al risulte il principi di no – contradizion che, ae sô volte, al gjenere il sub – principi di identitât e il sub – principi di leteralitât:
Ancjemò: il pinsîr analitic – leterâl si avâl dal metodi dedutîf (pûr e ipotetic) e dal metodi indutîf (statistic).

Par tant decodificant i materiâi dai “Mîts, Flabis e Liendis dal Friûl Storic“, in peraulis puaris passant dal pinsîr imagjinatîf – simbolic al pinsîr analitic – leterâl, si rindin comprensibii, atuâi, pregnants i problemis esternis dal om; no dome, ma si acuarzisi che ce che noaltris vuê o separîn, fats e valôrs, pai primitîfs e operave une cun – fusion di aspiets e di situazions, une unitât fondant.

Sei la ricuelte des Fonts che i Studis e Interpretazions a son un servizi dât al Friûl par tirâ dongje: vastitât e pregnance di problemis, insegnaments di vite, ampliaments di orizonts, sgjâfs tal passât che e je atualitât, modernitât e ancje avignî.

Galliano Zof

Sumari

  • Jenfri vîfs e muarts
  • Benandants e Terapeutis / Terapeutidis
  • Difusion, origjin comune, morfologjie
  • Benandants e fenomens siamanics te leterature dal Friûl
  • Zontis e detais