Home » L’Istitût » La storie

La storie

La ativitât dal Istitût pe Ricercje e la Promozion de Civiltât Furlane “Achille Tellini” e nas tal 1992 cul plui grant progjet di ricercje antropologjiche de nestre Regjon, ven a stai la realizazion de golaine “Mîts, Flabis e Liendis dal Friûl storic”.

Chest progjet al è stât il ferâl che al clamât dongje i socis fondadôrs:

Gianni Cappelletti, Massimiliano de Pelca, Carlo Dorligh, Maria D’Osualdo, Renato Fiorini, Beno Nadale, Attilio Ninino, Valter Peruzzi, Lamberto Presacco, Adriana Ronco, Ivo Scagliarini, Odorico Serena, Rosalba Stefanutti, Domenico Zannier e Galliano Zof.

Al è stât propite pre Meni Zannier, scritôr e poete epic furlan, candidât al premi Nobel pe Leterature se segnalazion de Universitât di Salisburc e di chê di Innsbruck, a proponi il nom di ACHILLE TELLINI par batiâ il nestri Istitût.

La nestre clape e je iluminade dal omp Achille Tellini e e cîr, tal agâr de sô opare, di davuelzi la ricercje e la promozion de civiltât furlane dant dignitât ae nestre lenghe. Chest aspiet al è fondamentâl par riscat de nestre identitât, par dismovi lis cussiencis e fâ cressi il sens di apartignince dal nestri popul.

O sin pal plurilenghisim, o sin vierç aes gnovis culturis, o sin pes nazionalitâts di ducj i popui e pal superament dai stâts nazionai modernis. O volìn cognossisi par cognossi miôr.

L’Istitût al à slargjât lis sôs ativitâts separant i cjamps di ricercje in vot dipartiments di studi.

Di là de golaine “Mîts, Flabis e Liendis dal Friûl storic”, o vin za burît fûr altris oparis editoriâls, sostignût e colaborât a events multimediâi e inmaneât tal 2009 la prime edizion dal Festival Bienâl Internazionâl di Curtmetraçs “Di incjant, l’Incjant”.

Cun chest nestri sproc, ti invidìn a sgarfâ tes nestri pagjinis par cognossinus miôr. La nestre sperance e je chê di cressi e di stiçâ il tô interès aes nestris iniziativis fasint simpri gnûfs amîs.