Home » Publicazions » La Montagne dai Danâts

La Montagne dai Danâts

Anade di publicazion:2012

Dipartiment: ,

Mîts, crodincis e leiendis de Mont Cjanine

Une “crodince milenarie”

Une des crodincis plui arcaichis e pandudis e je chê dai muarts che, une volte bandonade la vite, si trasferivin te oltritombe. Cheste convinzion e jere ben inlidrisade prime che al vignìs il cristianisim, ancje te nestre realtât gjeografiche e culturâl.
I antîcs furlans, duncje, come in altris comunitâts contemporaniis, a àn crodût che i Inferis a fossin logâts di cualchi bande, in lûcs inacessibii, ma pûr simpri a voli viodint.
Se i antîcs Grêcs a crodevin che il Tartaro, guviernât di Ade, al fos sistemât sot de tiere, cjalât a viste di Cerbero, il mostruôs cjan a trê cjâfs, i nestris lontans progjenitôrs a imagjinavin che i lôr muarts si dessin dongje tes golis inviolabilis de montagne infernâl.
La etimologjie stesse e rimande a la idee dal cjan infernâl che al vuardie di continui sul ream dai muarts.

Planc a planc, soredut sot de pression de predicjadure cristiane, cheste vision e je lade definintsi fintremai a ridimensionâ il compit de montagne, che e finirà par davuelzi dome la funzion di galere dai muarts cence sperance di rivâ a lâ sù tal paradîs. La fuartece pagane dai muarts si è trasformade, alore, intun lûc di contenzion e di pene dai danâts cristians.
I necuitôs di chestis tieris, in veretât, a son responsabii di brutis azions che, in dì di vuê, a somearessin veniâls, tant che ancje il confessôr plui inflessibil al podarès licuidâlis cuntune amende ridicule. Pai nestris sevêrs protofurlans, però, i inagadôrs di vin, i mulinârs fals e i imbroions di basse leghe, a jerin des creaturis de piês cualitâts, che e sotstevin di sigûr al diaul che al direzeve i lôr odeôs ats di vîfs e po sul Canin di muarts.

I danâts a vevin di sopuartâ lis torturis plui tremendis, come chês di spacâ la piere o di crevâ la glace. Il revoc dal rodolament des cjadenis si pandeve fintremai te valade, slargjantsi in dute la planure, fin a lenzi la lagune di Grau e di Maran. La sezion antologjiche e racuei une grampe significative di materiâi che ancjemò
a vegnin a flôr de profonditât dai timps, fintremai te jentrade dal Tierç milenari. No costituissin aromai temis di contis popolârs, ma a fasin part pûr simpri di une testemoneance di chês crodincis che a interessin l’urdidure de vite agri pastorâl.

In plui al va marcât che chestis contis a son stadis scritis tes lenghis dai contadôrs: lis diviersis feveladis furlanis, il resian e il sloven. In sumis une gjostre narative che e compon l’afresc popolâr de crodince di oltritombe e che e sposte la sede dal infier te panze de montagne dai danâts.

Luigi Geromet
President dal Istitût “Achille Tellini”