Home » Publicazions » La valîs dai siums

La valîs dai siums

Anade di publicazion:2012

Dipartiment:

L’Istitût “Achille Tellini” al à il plasê di presentâ cheste racuelte di poesiis di Egle Taverna.

L’Autore e je cognossude pai tescj che periodicamentri a vegnin publicâts su la stampe locâl. Cumò, cu “La valîs dai siums” e ven publicade la sô produzion poetiche scrite tal zîr di cuasi dîs agns. Jê e à sielzût di scrivi par furlan, che e je la lenghe cjapade sù dai lavris di sô mari, parcè che lu considere il mieç espressîf a jê plui coerent e parcè che i permèt di palesâ chê veretât intime che e stâ tal profont dal so spirt.

Di sigûr il furlan al à la frescjece des lenghis des origjins e al è perfet come mieç di comunicazion. L’Autore lu dopre, rispietant rigorosamentri la grafie normalizade e uficiâl. La traduzion par talian, che jê e propon, e rive istès a ufrî la iridessence dai sintiments, ancje se alc di intim pûr al sbrisse, ma ben si lee cul origjinâl.

Te sô poesie un puest di rivuart al è rapresentât dal paisaç. In efiets, i lûcs de sô infanzie e chei de vite adulte – si trate pûr simpri di realtâts di paîs o di centris di dimensions contignudis e no di grandis citâts, forsit parcè che ca la vite e je plui orientade al util, mentri la poesie e nas tant che un regâl – a son mutîf di ispirazion e a fasin di sfont a diviersis composizions che a rivochin events significatîfs e che a deventin
cuasi un altri “jo” dialogant.

Parmìs a un mont poetic che si nudrìs di afiets familiârs, di esperiencis personâls e coletivis cuntun sens di une penze maniere di sintî, che al met dongje oms, creaturis viventis e robis, al ven fûr ancje l’impegn e la riflession su lis vicendis storichis dal Nûfcent, sul problem dal confin che al à tant dividût comunitâts abituadis a vivi di secui insieme e lis tragjediis che a segnin il nestri moment storic.

Il dut al ven afidât a une scriture ispirade che e risulte particolarmentri vigorose tal trasmeti, cence enfasi retoriche, lis variis modulazions de conte che si davuelç jenfri moments lirics e di cidinis serenitâts, tra memorie e judizi, tra particolâr e universâl.

Luigi Geromet
President dal Istitût “Achille Tellini“